Konferenca "Përmirësimi i Sistemit të qeverisjes së Shoqërive Aksionere në Shqipëri - Nevojat e Tashme dhe Sfidat e së Ardhmes" u organizua në "Hotel Tirana International" me datë 31 janar 2008. Kjo ngjarje shënoi mbylljen e veprimtarive të projektit të AATDA-AL "Përmirësimi i Qeverisjes së SHA-ve në Shqipëri".

Konferenca ishte një organizim i përbashkët i AATDA-AL me Dhomën e Tregtisë dhe Industrisë Tiranë. Mbështeje u dha edhe nga Projekti i IFC mbi qeverisjen e shoqërive aksionere (Projekti PE-PSE). (shkarko programin e konferences)

Morën pjesë 65 përfaqësues të SHA-ve (manaxherë, anëtarë bordesh dhe aksionerë), përfaqësues të institucioneve rregullatore dhe administratës qendrore, organizatave të biznesit dhe të shoqërisë civile, profesionistë të fushës së biznesit dhe përfaqësues të projekteve ndërkombëtare, OJF të interesuara, etj. Konferenca u përqëndrua në paraqitjen e përfundimeve dhe të vlerësimeve të përgjithshme mbi projektin dhe për të diskutuar publikisht mbi kërkesat dhe nevojat për zbatimin konkret të parimeve të corporate governance.

Pjesëmarrësit u informuan mbi disa nga arritjet me ndikim në përmirësimin e standardeve të Qeverisjes së SHA.ve dhe në klimën e biznesit në Shqipëri, siç u konsideruan Ligji i ri për shoqëritë tregtare, Ligji i ri i letrave me vlerë, aplikimi i Standardeve Ndërkombëtare të Raportimit Financiar, trajtimi i çështjeve të corporate governance në kurrikulat universitare, etj.

Vëmendje iu kushtua diskutimeve mes ekspertëve dhe përfaqësueve të institucioneve të interesuara mbi disa nga elementët e praktikave të sotme të qeverisjes së SHA-vë në Shqipëri dhe perspektivës për zbatimin e standardeve të përparuara të fushës, në kuadër të reformës së mjedisit të biznesit dhe, në veçanti, rritjes së rolit të sektorit privat në këto ndryshime. (Shkarko Përfundimet e Konferencës)